Aggressiv bjørn tok lam

Bjørnen vart først observert av tre jenter som såg at den tok eit lam. Fleire vaksne drog deretter ut for å jage bjørnen og samle saman sauene.

Avisa Opdalingen skriv at Per Christiansen og fleire andre var i nærkontakt med bjørnen fleire gonger medan dei sanka saman sauene som var på beite i lia.

– Vi kom straks i nærkontakt med bjørnen. Først kom den i lange byks mot oss, før den stoppa opp berre nokre meter frå oss. Vi fekk det travelt med å samle inn sauene. Medan vi heldt på med det, høyrde vi bjørnen flere gonger like i nærheita av oss. Bjørnen verka aggressiv og eg vil be folk om å vere svært forsiktig, seier Per Christiansen.

Oppdal kommune har no søkt Direktoratet for naturforvaltning om fellingsløyve på bjørnen.

Det blir spekulert i om dette kan vere bjørnen som for kort tid sidan passerte gjennom Rindal, Halsa, Surnadal og Sunndal. Denne bjørnen vart fotografert på Rindalsskogen. Bjørnespor vart observert fleire stader i Surnadal, mellom anna ved alpinanlegget ved Grytåfeltet (bildet t.h.).