Energikamp, musefellebilar og laksekåring

Den lokale Energikampen har blitt ein stor suksess, og for tredje gong vart det i år arrangert finale under Laksefestivalen. Gjennom Energikampen får både ungar og vaksne lære seg samanhengen mellom energi og miljø, og rundt om på skulane har det blitt gjennomført ulike øvingar - med kåring av ein vinnar på kvar skule.

Laurdag var det først kvalifiseringskamp mellom lag frå Surnadal, Rindal og Halsa, der det vart konkurrert i mellom anna kjempesprettert, kulelabyrint og kunnskapsquiz. Deretter møttes dei tre beste laga - som i år kom frå Mo, Øye og Bæverfjord - til finale. Etter ein jamn konkurranse, vart det til slutt klart at laget frå Øye gikk til topps. Laget besto av Hege Sivertsen, Lisbeth Sollid, Malin Tørset Brøske og Jonas Husby (bildet t.h.), og førstepremien er ein tur for heile klassen til Energisenteret på Hunderfossen.

Laget frå Bæverfjord vart nr. 2, og besto av Inga Husby Foss, Martinus Bævre Solli og Ole Kristian Solem. Mo-laget kom på tredjeplass, og besto av Sigrid Mo Bævre, Lilly Viktoria Mo Sandberg og Anna Naterstad Røv.

Finalen i musefellebilløpet vart også ganske så nervepirrande, og vinnarane Vebjørn Bergheim, Ingrid Bergheim og Rune Schei Bergheim sikra seg til slutt førsteplassen med seks hundredelar betre tid enn argaste konkurrent.

Etter at ingen klarte å lande laks på over fem kilo under fiskekonkurransen i fjor, var det i år jackpot og sjanse til å vinne 60.000 kroner som lokka dei 168 deltakarane. Men under årets konkurranse i Surna var det heller ingen som klarte å passere den magiske vektgrensa. Dermed har potten til neste år auka til 90.000 kroner, noko som truleg vil vere svært så godt "agn". Nærast i år var Gunnar Evensen frå Frei, med ein laks på 4,8 kilo.

- Hadde laksen ete ei salamipakke før du tok den, hadde du blitt kåra til laksekonge med eitt grams overvekt, sa ein smilande ordførar Mons Otnes under premieutdelinga.

Klikk på bilda under for større versjonar.