MGP jr.-gjengen fylte Storstuå - og Frognerparken!

Det vart ei travel helg for Batteri og dei tre tidlegare MGP jr.-vinnarane Malin Reitan (vinnar i 2005), Celine Helgemo (2007) og Jørgen Dahl Moe (2009). Surnadal-bandet og dei tre solistane skal i sommar ha fleire show saman rundt om i landet, og etter ei intensiv øvingsperiode, var det fredag kveld stor generalprøve i Surnadal Kulturhus. (Øvste bildet)

Surnadalingane fylte Storstua for å få med seg den rundt ein time lange konserten, der Batteri i tillegg til å spele eigne songar også var backingband for Malin, Celine og Jørgen.

Sjølv om gjengen etter showet skulle til Værnes for overnatting før første fly til Oslo laurdag, tok dei seg tid til autografskriving i kulturhuset.

Etter ein svært vellukka konsert, vart det lang kø for å sikre seg autografane til den populære gjengen. Les meir om dette i tk.no.

Laurdag vart FN sin Verdas miljødag markert over heile verda, og Batteri, Malin, Celine og Jørgen blant artistane som deltok på Hafslunds miljøfestival for barn i Frognerparken i Oslo.

Gratisarrangementet er den største miljøfestivalen som er arrangert i Norge, og i løpet av dagen var rundt 30.000 innom Frognerparken for å få med seg artistar som A1, Tone Damli Aaberge, Jaa9 & OnklP, Madcon, Bjørn Johan Muri, Didrik Solli-Tangen - og altså MGP jr.-artistane.

Batteri & Co var i aksjon rundt klokka 13.00, fekk med seg publikum både på allsang og taktfast klapping - og vart belønna med lang og solid applaus i sommarvarmen.

Bildet t.h. viser Malin, Batteri-vokalist Hans Olav, Celine og Jørgen som deler på vokaljobben på Batteri-songen "Sorte får".

Klikk på bilda under for større versjonar.