Tips en venn
Send til e-post:
Fra e-post:
Melding:
Kode 
trekloveret_300x209

Bokslepp i Surnadal

”Ord te gagns”

Opprettet: 21. sep. 2010
Opprettet av: Tonje Mogstad Høivik
Endeleg er ho her: Ordlista over surnadalsmålet, ”Ord te gagns”. Heile 6000 unike surnadalsord og eiga lydbok er resultatet av eit tre år langt dialektprosjekt i regi av Surnadal Heimbygdlag. – Vi håpar boka vil inspirere og knytte band mellom fortid, notid og framtid, seier Sverre Hatle, Gunhild Mogstad og Gustav Kvendbø i redaksjonsnemnda.

Arven frå Bjarne Østbø
Mange lange kveldar har gått til arbeidet med boka, som byggjer på arkivet Bjarne Østbø etterlot seg i 1980. Styraren ved Surnadal Ungdomsskule sat på både ferdige og uferdige setlar med ord som han registrerte i Surnadal. Desse var samla i et spesiallaga treskrin, som seinare vart overlate til Surnadal kommune.

Under Surnadal Heimbygdelags årsmøte i 2006 foreslo Magne Holten at ein kunne gjere noko med dialektmaterialet til Bjarne Østbø. Under årsmøtet 2007 vart ei nemnd beståande av Sverre Hatle, Gunhild Mogstad og Gustav Kvendbø oppnemnd, og i oktober avtalte dei ei dialektspalte med lokalavisa Driva, ”Ord på kistebotnen”, som inviterte lesarane til å komme med innspel til ordlista.

Engasjement
I perioden fram til februar 2009 aktiviserte heimbygdlaget mange språkinteresserte personar i og frå bygda, som vart viktige medspelarar for nemnda. Ordboka vart også digitalisert og publisert på Surnadal Kommune sine heimesider. Den nyaste versjonen kan du lese på Surnadal kommune sine sider her.

- Det er tydeleg at folk i bygda synes dialekta er viktig. Eg har fått mange telefonar og e-postar av engasjerte sambygdingar i arbeidet meg boka, seier Sverre Hatle.

Dette gjaldt også redaktørane av boka.

-  I innspurten av skriveperioden vakna eg om natta av ord og uttrykk som vi måtte ha med, ler Gunhild.

November 2009 bestemte nemnda seg for å gi ut bok med CD, med eit mål om utgiving før jul 2010. Avtale med trykkeri vart gjort, og dei valde å levere trykkeferdig materiale utan omvegen om forlag.  
 
- Vi ville ikkje risikere at nokre utanfrå skulle gjere endringar dei ikkje skjønte seg på, seier Hatle.  
 
Ingen fasit
Ei av utfordringane for redaksjonsnemnda har vore kva for kriterium dei skulle gjere for presentasjonen av orda. Det finst mange oppfatningar av korleis dialektorda skal skrivast. Dei landa til slutt på å skrive så nært nynorsk der det er mogleg, medan lydskrifta i større grad tek for seg uttalen.
 
- Det er viktig å understreke at dette ikkje er ein fasit, seier redaktørane om boka som både skildrar samansettingar og bøyingsformar.
  
Bokslepp og Mari Boine
Førstkommande fredag 24.09 kl. 18.00 blir det halde offisielt bokslepp for ”Ord te gagns”. I foajéen i Surnadal Kulturhus vil dei oppmøtte få ei orientering av arbeidet med boka, i tillegg til smakebitar – og sjølvsagt kunne kjøpe eit signert eksemplar.
 
- Fokuset til boka er surnadalsmålet som litterært språk, som har ei lang historie, seier Hatle. Vi håpar særleg dei nyare generasjonane vil setje pris på boka.
 
Same kveld som boksleppet held Mari Boine konsert. Enda ein god grunn til å besøkje Surnadal Kulturhus på fredag? 
Les meir om konserten ved å trykke her.  
boka1
tekst
Over 6000 ord er samla i boka, som har teke over 3 år å skrive