Satsar vidare med nytt firma

Kostnadane vart for store for Siv Teknikk, som jobba med termisk sprøyting og maskinering og som hadde offisiell opning i september 2008. Siv Teknikk oppsto på ruinane etter at røyrselskapet Wavin forlot Surnadal for nokre år sidan, og var eigd av moderselskapet Surnadal Industri Vekst (66 prosent), medan Jan Tore Andersen og Asbjørn Saltrø hadde til saman 34 prosent. Aksjekapitalen vart tapt for alle involverte, og 2009 endte med nærare fire millionar kroner i minus.

No har altså Andersen og Saltrø starta Powder Tec Produksjon, som søkjer Surnadal kommune om eit lån på 300.000 kroner for å fullfinansiere planlagt eigenkapital/aksjekapital i eit nytt selskap med namnet Powder Tec AS.

Formannskapet skal drøfte søknaden torsdag 4. november, og i sakspapira heiter det mellom anna at etter at SIV Teknikk AS gjekk konkurs, har gründarane bak selskapet jobba iherdig vidare for å vidareføre erfaringar, kunnskap, sertifiseringar og eit omfattande kvalitetssystem. Da eigarane av SIV Teknikk AS av likviditetsomsyn måtte sende selskapet til skifteretten i sommar, var omsetninga og etterspurnaden stigane og høgare enn nokon gong, men oppgangen kom altså for seint. Grundarane har framleis klokkartru på konseptet, og jobbar iherdig for å kome i gang med videreføringa av verksemda, som altså skal få namnet Powder Tec AS og vil ved oppstart sysselsetje fem personar.

Grunnlaget for finansieringa av Powder Tec AS er ein eigenkapital/aksjekapital som ut frå kostnadsbilde og lånebehov er sett til to millionar kroner Denne er planlagt fordelt slik: Powder Tec Produksjon AS 800.000 kroner (500.000,- + lånet på 300.000,-), Indre Nordmøre Invest AS 800.000 kroner og Stavnes Holding AS 400.000 kroner.

Det er og har vore jobba intenst med å finne fleire eigarar slik at eigenkapitalkravet blir fullteikna. Fleire har eit mogleg eigarskap under vurdering, men dei signaliserer at ei avgjerd vil ta tid. Denne tida har ikkje det nye selskapet.

"Skal Powder Tec AS behalde kvalifisert og sertifisert arbeidskraft samt opparbeida kunderelasjonar og marknadsandel må selskapet i drift straks. Tida er ein veldig viktig suksessfaktor. Difor rettar Powder Tec Produksjon AS seg no til Surnadal kommune for om mogleg kunne komme fram til ei rask avgjerd gjennom eit lån, for slik å kunne oppfylle kapitalkravet for å sette i gang verksemda", heiter det i sakspapira.

I sine vurderingar skriv rådmannen mellom anna "Eit nytt selskap med det same utstyret, den same kompetansen, dei same sertifiseringar samt opparbeid kjennskap til marknaden vil i realiteten tre inn i den same marknadsposisjonen som den SIV Teknikk AS forlot. Men det er enkelt å forstå at viss det går for lang tid, vil både tidlegare tilsette (kompetanse/sertifiseringar) og marknaden finne seg andre arenaer. For Surnadal kommune kan det vere lett å gå i den fella at ein fokuserer på kva som er gått tapt gjennom konkursen til SIV Teknikk AS. Men viss ein angriper dette offensivt og bidreg til at ei reetablering lukkast, vil i realiteten også dei verdiane Surnadal kommune gikk inn i SIV Teknikk AS med bli vidareført gjennom det nye selskapet. Difor er rådmannen positiv til å imøtekome søknaden frå Powder Tec Produksjon AS".

Men rådmannen understrekar også at det for Surnadal kommune er ønskeleg å få igjen pengane så snart som råd slik at ein kan nytte dei i nye og andre prosjekt. Difor ønskjer rådmannen at det blir stilt et krav om at arbeidet med å få på plass fleire eigarar i Powder Tec AS blir opprettheldt og at Powder Tec Produksjon AS i ein slik situasjon sel seg ned med 300.000 kroner og slik vil tilbakebetale eigenkapitallånet frå kommunen.