vårsøg hotell låg bru_350x263

Skiltar gangbrua mellom hotellet og kulturhuset

Opprettet: 1. sep. 2010
Opprettet av: Bjørn Tore Brøske
Den nye gangbrua mellom Vårsøg Hotell og Surnadal kulturhus er for låg, men dette vil mest truleg ikkje få andre konsekvensar enn at det blir sett opp eit skilt som varslar at store køyretøy ikkje må passere under. Det er konklusjonen etter eit møte mellom Statens vegvesen, Vårsøg Hotell, Surnadal kommune og arkitektkontoret Solem Hartmann i dag, onsdag.

Som Trollheimsporten kunne fortelje søndag, er "Vengespennet" - gangbrua over Miljøgata mellom hotellet og kulturhuset på Skei - 18 centimeter lågare enn minstekravet på 4,70 meter som vegvesenet har sett for dette prosjektet.

Det er delen over busslomma på kulturhus-sida som er for låg, og det er denne delen som no truleg vil bli skilta.

- At gangbrua ikkje heilt oppfyller høgdekravet over busslomma, er ikkje ideelt, men i realiteten er dette likevel heilt udramatisk. Høgda over sjølve køyrebanen er 4,70 meter, slik kravet var, seier Lars Guldahl i arkitektkontoret Solem Hartmann til Trollhemsporten. Han meiner den mest sannsynlege løysinga blir skilting.

- På skiltet vil det truleg stå at makshøgde for bilar som kan passere der brua, er 4,30 meter, og at større bilar må køyre rundt kulturhuset. Dette er det Vegvesenet som skal endeleg avgjere, seier Guldahl, og legg til:

- Eg vil understreke at det faktum at gangbrua vart for låg, ikkje skuldast ei "Det er lettare å få tilgivelse enn tillatelse"-haldning. Utgangspunktet for gangbru-bygginga var reelle høgder på to bygg, etasjeskiller samt plassering av rullestolrampe. Brua slik den står no, kjem ikkje til å vere ein trafikkfare for nokon.

Les også: Gangbrua mellom Vårsøg Hotell og kulturhuset er for låg