Spennande jubileumsutstilling!

Ole Mauset ved sida av statuen "Goliat", som det gjekk med 800 kg marmor for å skape. Alle foto: Norunn Holten

Dette er nemleg ei utstilling som alle med det minste snev av interesse for kunst bør få med seg. Heile 26 statuar blir stilt ut: tre av dei i marmor, resten i bronse. Statuane er klassisk figurative og viser menneske og dyr. Det er fuglane som dominerer; rovfuglar som ørn og hubro. Mange viser også menneske og fuglar i lag, så forholdet mellom menneske og dyr står sentralt i utstillinga.

Ole Mauseth har vore i Italia og opplevd stadane dei store renessansemeistrane henta marmoren sin ifrå. Etter å ha tatt ein titt på utstillinga, lurer vi på om han kan ha fått med seg litt av gåta bak Mona Lisas smil heim att til Norge. Vi kan i alle fall love at det vil bli mange facinerande og gåtefulle ansikt å sjå på utstillinga som opnar i Finstuå fredag kveld. Du trur du har tolka uttrykket, men så ser du noko nytt og må revurdere oppfatninga. Dei mange talande ansikta er derfor også karakteristisk for utstillinga.

Ole Mauseth er som tidlegare sagt surnadaling, og dreiv med taksidermi (preparering og utstopping av fuglar og dyr) frå han var åtte til han var 25-26 år gammel. Han fortel at dette er eit tilbakelagt kapittel, men at det var ein sterk lidenskap medan han dreiv med det. Han kan også dra nytte av erfaringar frå dette arbeidet når han no jobbar med skulptur.

 Det var ifølgje han sjølv litt tilfeldig at han kom i kontakt med kunstnarmiljø. Han arbeidde først saman med Ole Geir Scanke i fire år, deretter eit år som taksidermist og utstillingsteknikar for Tromsø museum. Sidan var han i tre år lærar i taksidermi på» VK1- taksidermist» ved Kvadraturen videregående skole i Kristiansand. Her kom han inn i eit kunstmiljø, og det var derfor her det heile starta, fortel han. Kristiansandsopphaldet resulterte i at han i vaksen alder begynte på Kunsthøgskolen i Bergen. Dei siste åra har han kunne leve av kunsten sin på heiltid.

Ole Mauset har budd i Mandal i 4 ½ år, men vil i løpet av hausten og vinteren flytte til Trondheim. -Akkurat i sommar er eg surnadaling! seier han. Det var kulturhusleiar Karstein Telstad som inviterte han til å halde jubileumsutstilling, ein invitasjon Mauset takka ja til. Tilfeldigheitene gjer at det no er 10 år sidan Mauset sist hadde utstilling i Surnadal, også det i Finstuå. Den gongen var han festivalutstillar i Vårsøghelga 2002. Det er med glede og spenning han ser fram til opninga av utstillinga. –Surnadalingane er jo patriotiske og flinke til å støtte opp om eigne kunstnarar, seier han, men innrømmer likevel at han er spent på reponsen. Utstillinga hans er open til 30. september- og er som alt sagt ei salgsutstilling.

Ole Mauseth held på med den siste finpussen framfor opninga i morgon kveld.

"Liten munk"i bronse!