Fredag
Fredag Lette regnbyger
Lette regnbyger
Lett bris
Lørdag
Lørdag Regn
Regn
Svak vind
Forfattere_350x236

Stor interesse for boka om Kvenndalen

Heile 70 interesserte tilhøyrarar var til stades på Stangvik skule da Lars Steinar Ansnes, Erling Myrbostad og Torbjørn Polden tirsdag kveld presenterte boka "Kvenndalen med Kvennbøtæla og Engjamarka". - Historisk har det vore mykje aktivitet her. Eit eventuelt overskot av bokprosjektet skal da også brukast i området, fortel Lars Steinar Ansnes.

Stangvik Historielag står bak utgjevinga av boka, som er ei vandring gjennom eit gammalt kulturlandskap som opp gjennom tidene har blitt bruka både til setring, markaslått, ymse næringsvirksomhet, jakt, rekreasjon og mykje anna aktivitet.

Dei rundt 70 personane som møtte opp på Stangvik-skulen tirsdag, fekk høyre Erling Myrbostad, Torbjørn Polden og Lars Steinar Ansnes fortelje om prosjektet samt sjå bilder som er bruka i boka.

Undertittelen på boka er "Historia - Kulturlandskapet - Folket", og ho inneheld mellom anna historisk oversikt for kvar seter og omtale av personar, dagleglivet, reidskap, vassdrag, stadnamn, jakt- og friluftsliv, geologi, historier og mange intervju. I tillegg har boka over 200 bilder, dei eldste frå tidleg på 1900-talet.

- Ideen til boka dukka opp i 2007, da Erling som setereigar og vi to andre som hytteeigarar som brukar området mykje, kom i prat. Vi kom fram til at dersom historia for området skulle dokumenterast, måtte det gjerast no. Primærkjeldene, dei som har førstehands kjennskap til historiene og aktiviteten i området, byrjar å bli gamle, seier Lars Steinar Ansnes.

Han fortel at dei tre forfattarane vart svært positivt overraska over interessa dei vart møtte med under arbeidet med boka.

- Folk stilte opp, både som muntlege kjelder og med bilder. Sjølv om vi har fått med rundt 200 bilder, var det ein hard utveljingsprosess, fortel Ansnes. Han legg til at Mediahuset og Åge Fossum har gjort ein svært bra jobb med utforminga av bokverket, og at Surnadal Sparebank stilte seg fantastisk godt bak prosjektet.

- Blir det økonomisk overskot av boksalet, skal det brukast i Kvenndalen-området, til dømes til skilting. Dette er eit av dei undervurderte turområda i Surnadal, som fleire bør gjere seg kjent med, meiner Lars Steinar Ansnes.