Picasa

Tok «bølgen» for nye bøfjordingar

Opprettet: 8. jan. 2013
Opprettet av: Anne Skjølsvold
Når ein utanlandsk familie slår seg ned i vesle Bøfjorden, må vi feire og vise at dei er velkomne! Slik tenkte bygdefolket da nederlandske Carla og Jan van Buggenum og dei fire barna deira kom flyttande ved årsskiftet. Måndag var det folksamt på Bøfjord-skulen, der små og store «tok bølgen» for innflyttarane.


 Barnefamiliar i Bøfjorden helsar dei nye sambygdingane velkomne. I midta framme sit pappa Jan van Buggenum med yngstegutane Jordi og Fabrice. Til venstre bak for dei er mamma Carla med Yannick og Daphne.

 

Tok "bølgen" for nye bøfjordingar

 

- Når ein utanlandsk familie slår seg ned i vesle Bøfjorden, må vi feire og vise at dei er velkomne! Slik tenkte bygdefolket da nederlandske Carla og Jan van Buggenum med barna Yannick (13), Daphne (11), Jordi (8) og Fabrice (6) kom flyttande ved årsskiftet.

Måndag var det folksamt på Bøfjord-skulen, der små og store «tok bølgen» for innflyttarane. Maria Garthe og Bodil Kvam Aasbø i foreldreutvalet hadde invitert og stod i spissen for velkomstkvelden.

Carla van Buggenum (44) er tilsett som ny butikksjef ved Bøfjord Samvirkelag, medan Jan (46) arbeider ved ei bedrift i Surnadal.  Familien bur på Haugen (Kastet) på Heggemstranda.

-   Vi helsa dei seks nye bøfjordingane velkomne med å bokstaveleg å «ta bølgen» for dei, seier Bodil Kvam Aasbø. – Deretter presenterte vi alle barnefamiliane i bygda og overleverte eit hefte med bilete, kart og annan informasjon.

Ho og Maria er begge innflyttarar til Bøfjorden og veit verdien av å bli godt imottekne –  med hjelp til både å lære stadnamn og bli innlemma i det sosiale og kulturelle livet.

Litt munter selskapsleik og lokal autografjakt skapte levande kontakt mellom dei 50-60 i gymnastikksalen. Og mellom godbitane på det avsluttande kveldsmatbordet lyste marsipankaka med eit stort «Velkommen».

Som talande symbol på framtidstru og optimisme gav bøfjordingane den nykomne familien gåvekort på eit epletre. – Dette kan de plante når de får dykk eiga tomt! sa Bodil Kvam Aasbø og uttrykte håp om at familien van Buggenum både kjenner seg velkomne til Bøfjorden og vil trivast i bygda

 

 Ingen tvil om kva som skulle stå på marsipankaka! 

 Munter autografjakt. Jan og Carla van Buggenum saman med Elisif Sæthervik Berg (t.h.)

Yannick (13) og Daphne (11) sjekkar autografsamlinga si.

 Og så var det mat! Brit Heggem (t.v.), Daphne van Buggenum og Sarah Ansnes Brusethaug.

 Fire blad van Buggenum fremst: Fabrice (6), Carla, Jan og Jordi (8).