Felleskor TK & ÅK_350x207

Vårsøghelg-konsert i Todalen kyrkje

Tonar under kyrkjetårn

Opprettet: 6. juni 2011
Opprettet av: Bjørn Tore Brøske
Med “Tonar under kyrkjetårn” på pinseaftan markerer 150-årsjubilanten Todalen kyrkje dei unike songtradisjonane i bygda. Forsamling, solistar, kor og instrument framfører songperler frå kyrkje, heim og skule. Solist Knut Iversen, Todalskoret, Åsskard Kyrkjekor og ei musikkgruppe går saman med forsamlinga i eit program der allsongen sikkert vil “stå i taket” på ekte todalsvis.

I gruppa spelar Runa Tunheim fele, Peder Hønsvik trekkspel, Gro Løfaldli bass og organist Bernt G. Bøe tasteinstrument.

Som kjent har Todalen ei skattkiste av sjøleigande folkemusikk. Difor har organisten komponert ei lita “Folketonemesse” over lokale feleslåttar og salmetonar - etter Hallvard Ørsal, Ane Husby og Tomine Husby. Her kling todalsmelodiane saman med nyskrivne korparti over kyrkja sine gudstenesteledd. Messa blir urframført på songkvelden.

Blant godbitane i programmet er også gjenhør med “Rannei-orgelet”. Dette trøorgelet var første instrumentet i Todalen kyrkje – ei gåve frå kårkona Rannei Husby, visstnok i 1916. Det vil klinge under folketonemessa og dessutan akkompagnere visa “På Sjåarberg”, som Leif Halse i si tid skreiv om nettopp denne “Rannei med huldrehåret”.

Men først og fremst ber kvelden preg av songskatten vi har hatt gjennom dei 150 åra som Todalen har hatt si eiga kyrkje.

“Tonar under kyrkjetårn” er eitt av mange Vårsøghelg-arrangement denne helga.

Klikk her for å sjå plakaten til songkvelden.