orkesteret_1_350x234

TrondheimSolistene til Vårsøghelga

Opprettet: 30. mars 2011
Opprettet av: Bjørn Tore Brøske
Dei er fleire gonger Grammy-nominert i USA og fekk nyleg Spellemannprisen 2010 for beste klassiske album. No er det klart at TrondheimSolistene saman med brørne Gjermund og Einar Olav Larsen kjem til Vårsøghelga 12.juni! Arrangørane har også offentleggjort at M.A.G frå Surnadal er blant banda som skal spele under rockekonserten laurdag 11.juni. Frå før er det kjent at Odd Nordstoga skal opptre på Kleivakvelden fredag 10.juni.

TrondheimSolistene og Gjermund og Einar Olav Larsen er blant artistane som skal opptre på avslutningskonserten søndag, melder Laget Vårsøg, som er medlem av Trollheimsporten.

TrondheimSolistene er eit internasjonalt anerkjent kammerorkester som består av unge og talentfulle musikarar. Orkesteret har turnert over heile verda, og vann Spellemannprisen 2006 i klassen klassisk musikk for albumet "Mozart: Violin Concertos" saman med Marianne Thorsen og Spellemannprisen 2010 for albumet "In Folk Style".

Gjermund Larsen er grossist i prisar, og vann Spellemannprisen for debutalbumet “Ankomst” i 2008. Han var også medverkande på TrondheimSolistene-plata "In Folk Style", og har blant anna vunne Landskappleiken klasse A – vanleg fele to gonger og fått Kongepokalen. Våren 2008 vart han den første til å avlegge diplomeksamen i folkemusikk på vanleg fele ved Norges Musikkhøgskole i Oslo.

Einar Olav Larsen er frilans musikar med base i Verdal i Nord-Trøndelag. Han har saman med broren Gjermund vunne gruppespell fele på Landskappleiken tre år på rad. Einar Olav har studert folkemusikk ved Ole Bull Akademiet.

Surnadal-bandet M.A.G består av vokalist Johnny Nonsens Myklegard, trommeslagar Jan Peter Husby, bassist Torbjørn Kvande og gitaristane Ola Langli og Frank sPoon Botten. Bandet ga i januar i år ut det gode debutalbumet "Magnolia".

- Musikken vår kan kanskje plasserast i landskapet mellom DumDum Boys og Seigmen. Men vi har eigenart, og folk må prøve å dra konklusjonane sjølv når dei hører oss, seier Frank sPoon Botten.

Les meir om Vårsøghelga 2011 her.

Følg Vårsøghelga og Laget Vårsøg på Facebook og laget si heimeside.