anders magne ormset_350x242

Auke i narkosaker i Surnadal

Truslar på grunn av stor narkogjeld

Opprettet: 10. feb. 2011
Opprettet av: Bjørn Tore Brøske
Medan det vart registrert 10 narkotikasaker i Surnadal i 2009, var det nær ei dobling i fjor til 18 saker. – Det er kanskje ikkje forferdeleg mykje, men uansett for mykje. Og det er ein aukande trend, seier politibetjent Anders Magne Ormset. Hasj og amfetamin er det mest brukte, men det er også heroinbrukarar i kommunen. Politiet kjenner også til minst eitt tilfelle der ein person vart oppsøkt og trua på grunn av stor narkogjeld.

Anders Magne Ormset møtte i føremiddag, torsdag, ordførar Mons Otnes og resten av kommunestyret i Surnadal for å orientere om rusutviklinga i kommunen.

Sjølv om Ormset understreka at talet på registrerte saker ikkje er skremmande høgt, er det ei tydeleg utvikling med aukande narkobruk i kommunen. Det er også registrert fleire brukarar av tunge stoff, og i fjor vart to personar berga etter å ha teke overdosar. Men ein surnadaling busett i Trondheim omkom på grunn av overdose.

Største narkosaka i Surnadal siste året var eit beslag på 65 gram amfetamin, tilsvarande cirka 250 brukardoser. Medan dei fleste saker blir avgjort ved forelegg, er amfetamin-saka ikkje avgjort enno.

Ifølgje Ormset er rusmiljøet i Surnadal dominert av menn, og det er eit etablert miljø med personar i byrjinga av 20-åra.

- Mange som har vore på avrusing, har ramla utpå igjen, fortalde Ormset. Ungdomskonsulent Lars Sæther supplerte med å orientere om at kommunen har rundt 15 personar i alderen 18-30 år som blir aktivt følgt opp.

- Mange slit med å finne seg ein plass å bu, og det er eit klart behov for fleire kommunale bustader. Det som er viktig når personar som har fått hjelp med rusproblema sine, kjem tilbake, er at dei slepp å hamne rett tilbake i det same miljøet dei var i.