Vedtok vilkårsrevisjon av Folla-Vindøla

- Dette er ei stor og viktig sak for miljøet og elvainteressene. Den har skapt stor interesse og stort engasjement, sa ordførar John Ole Aspli (bildet) da kommunestyret einstemmig vedtok vilkårsrevisjon for statsreguleringa av Folla-Vindøla vassdraga i dag. Rindal samarbeider med Surnadal om dette. Dei har gjort same vedtaket.

I denne saka vedtok kommunestyret det same som Surnadal kommunestyre vedtok for seks dagar sidan. Dei to kommunane skal samarbeide om denne saka.

 

- Vi skal gjere dette arbeidet i lag og saman medlokale interesser. Solide og gode faglege data ligg i botnen for å kreve nye vilkår for konsesjonskrava til Statkraft. Det er viktig å få til moderne og fornya vilkår for kraftproduksjon. For oss i Rindal er det viktig å få meir vatn i elva i vår det av Surnavassdraget. Samtidig må vi hugse på at det stort sett er rindalingar som veks opp i Surna. Gyteplassane ligg stort sett i vår kommune. Og her har vi eit ansvar, sa ordførar John Ole Aspli.

 

 

1. Surnadal og Rindal kommunar skal i fellesskap og på vegne av almenne interesser og verdiar kreve revisjon av gjeldande konsesjonsvilkår i Folla-Vindøla reguleringa av 21.12.1962. Dette arbeidet skal samkjørast med
utarbeiding av forvaltningsplan etter vassforvaltningsforskrifta.

 

2. Ansvaret for arbeidet organiserast slik:
Styringsgruppe: Ordførarar og rådmenn i Rindal og Surnadal kommunar.
Arbeidsgruppe: Konsulent Tor Ziegler, Bodil Gjeldnes (Surnadal kommune), Vebjørn Knarrum (Rindal kommune), 1 representant frå Surnadal elveeigarlag, 1 representant frå Rindal elvalag, 1 representant frå Samarbeidsorganet for
Surna.
Referansegruppe: Breitt samansett for best muleg kontakt med almenne interesser. Referansegruppa oppnemnast av styringsgruppa.

 

3. Hovedmålet med den delen av arbeidet som gjeld krav om revisjon av eksisterande vilkår i konsesjonen til Folla-Vindøla reguleringa skal vere å styrke laks- og sjøaurestammane i Surnavassdraget, samstundes som at vassdraget og nedslagsfeltet skal gi grunnlag for bærekraftig kraftproduksjon.

 

4. Kommunestyret vil kome attende til finansiering av arbeidet når kostnadane med dette er meir avklart.

 

Tekst og foto. Willy Karlstrøm