Hyggetreff på sjøbruksmuseet

Tekst: Bernt G. Bøe.

I regi av Bøfjorden Historielag har sjøbruksmuseet no gjennomført 25 sesongar med program kvar helg frå juni til september. 390 søndagar med kaffe og lokalhistoriske tema har samla over 20 000 menneske sia starten i 1995.

Leiar i historielaget, Bernt Bøe, viste lysbilete over aktivitetene i 2019. Her har skuleeklassar og lag vore innom utanom helgene, og laget har guida turistar på både sundbåt og buss.

Gjennomsnitts søndagsbesøk på museet låg i år noko over 50. Temalista spenner vidt, frå lokal kraftutbygging og plastbåtproduksjon via barneleikar og hobbyaktiviteter til kortreist forfattarskap og 1700-tals krigshistorie.

Nye gåver til museet vart viste fram – blant desse Jon Storløkkens modell av «Cutty Sark», flotte skutebilete frå Ole Kristen Skuggevik og endatil perseutstyr for prestens klassiske pipekrage!

På treffet presenterte Terje Holm sitt komande bokprosjekt, og Einar Oterholm viste lokale kart med vegprosjekt frå 1700- og 1800-talet.

Dordi Glærum Skuggevik bar fram ein velforma takk til dugnadsånda og kulturarbeidet i denne delen av Surnadal kommune.

Ingressfoto: Desse – og fleire til – har sørga for nok ein aktiv sesong i Bøfjorden Historielag. (Foto: Terje Holm)

Leiar Bernt Bøe viste nokre av årets aktiviteter gjennom tilbakeblikk på lerretet. (Foto: Terje Holm)

Gunnhild Vetleseter Bøe, Randi Vetlester Bøe og Eli Husby Moen sørga for servering av middag og kaffe. (Foto: Terje Holm)

Aldri eit hyggetreff utan historisk «haubrott». Her er det Ole Kristen Skuggevik, søster Dordi Skuggevik og Ragnhild Skrøvset som legg haua i bløytt. (Foto: Bernt G. Bøe).

Styret i Bøfjorden Historielag kan sjå tilbake på ein fin sommarsesong. Frå venstre Magne Bøe, Gunnhild Vetleseter Bøe, Eli Husby Moen, Bernt G. Bøe og Inge Dønheim. (Foto: Randi Vetleseter Bøe).
 

Bøfjorden Historielag er medlem av Trollheimsporten.